Maraming gustong magsimulang mag-bike pero nauudlot agad dahil sa presyo.
Kapag nagtanong ka kasi online kung anong magandang first bike, may magsasabi agad na dagdagan mo na lang ang budget mo. Kapag ₱8,000 ang budget mo, sasabihin gawing ₱12,000. Kapag ₱12,000, sasabihin gawin nang ₱20,000.
Hanggang sa hindi ka na nakabili.
Kaya ngayon tingnan natin itong Trinx Edge Quest 29, isang budget mountain bike na puwedeng maging practical na first bike para sa beginners, students, casual riders at mga gustong mag-bike-to-work.
Hindi natin ito ikukumpara sa mga mountain bike na tatlo o apat na beses ang presyo. Hindi rin natin sasabihing kaya nitong gawin lahat ng ginagawa ng isang trail bike na pangkarera.
Ang mas importanteng tanong ay ito:
Para sa presyo nito, sapat ba ang Trinx Edge Quest 29 para makapagsimula ka nang maayos sa cycling?
Ako si Ian How, at bike check natin ngayon ang Trinx Edge Quest 29.
Ano ang Trinx Edge Quest 29?
Ang Edge Quest 29 ay isa sa mga entry-level mountain bike ng Trinx. Alloy ang frame nito, 29er ang gulong, may front suspension at karaniwang binebenta na may Shimano entry-level drivetrain at disc brakes.
Kailangan ko lang linawin na maaaring mag-iba ang exact specifications nito depende sa production batch at kung saan ito binili.
May mga Edge Quest 29 na naka-3×7 o 21-speed. May makikita rin kayong listings na 3×8 o 24-speed. Posible ring magkaiba ang brand ng brakes, crank, hubs o ibang piyesa depende sa inilabas na batch.
Alloy frame at 29er wheels
Unahin natin ang frame dahil ito naman talaga ang pinaka-base ng bike.
Ang Trinx Edge Quest 29 ay karaniwang nakalista na gumagamit ng 6061 aluminum alloy frame.
Magandang starting point ang alloy frame sa ganitong presyo dahil mas resistant ito sa kalawang kumpara sa ordinaryong steel frame. Hindi ibig sabihin na sobrang gaan na agad ng buong bike, dahil may bigat pa rin ang fork, wheels, tires, crank at iba pang components.
Pero para sa isang beginner bike, okay na may alloy frame kang puwedeng gamitin sa daily commute, exercise, coffee rides, village rides at paminsan-minsang long ride.
May internal cable routing din ang ilang Edge Quest units. Mas malinis tingnan dahil may mga cable na dumadaan sa loob ng frame imbes na puro exposed sa labas.
Hindi naman nito awtomatikong pinapaganda ang performance, pero malaking bagay din ang malinis na itsura lalo na sa budget bike.
Ang gulong nito ay 29 inches.
Isa sa magagandang katangian ng 29er ay mas madali nitong nalalagpasan ang maliliit na lubak, bitak sa kalsada at uneven surfaces. Kapag nakakuha ka na rin ng momentum, maganda itong i-maintain lalo na sa mahahabang diretsong kalsada.
Practical ito para sa city riding at bike-to-work dahil hindi naman perfect ang mga kalsada natin.
May mga lubak, road repairs, drainage covers at minsan may biglang gravel sa gilid. Hindi ibig sabihin na hindi mo na mararamdaman ang mga ito, pero mas forgiving ang malaking gulong kumpara sa mas maliit na wheel.
Kailangan lang siguraduhin na tama ang bike size para sa rider.
Hindi porke 29er ay para lang sa matangkad, pero dapat tama ang frame geometry at hindi ka hirap sumakay, bumaba o abutin ang handlebar.
Mas magandang subukan muna ang actual bike kaysa umasa lang sa height chart sa internet.
Basic suspension fork
May suspension fork sa harap ang Trinx Edge Quest 29.
Para sa beginner at commuter, nakakatulong ito sa vibration mula sa lubak, humps, road cracks at light gravel.
Pero maging realistic tayo. Basic suspension fork ito.
Hindi ito kapareho ng air fork na makikita sa mas mahal na mountain bike. Hindi rin ito ginawa para sa malalaking jumps, matinding drops o mabilis na technical downhill.
Puwede ito sa normal city roads, light trails at rough sections, pero huwag natin ipilit sa paggamit na hindi naman para dito.
Madalas kasi kapag may nakitang suspension fork, iniisip agad na puwede na sa lahat ng klaseng trail. Doon nagsisimula ang problema.
Mas tatagal ang bike kapag ginagamit ayon sa purpose nito.
Gears at Shimano components
Depende sa batch, ang Trinx Edge Quest 29 ay maaaring naka-3×7 o 3×8 drivetrain.
Ibig sabihin, mayroon itong tatlong chainring sa harap at pito o walong cogs sa likod.
May nagsasabi na luma na ang triple chainring dahil uso ngayon ang one-by setup. Totoo naman na mas simple at mas malinis gamitin ang one-by drivetrain, pero mayroon pa ring advantage ang triple chainring para sa budget beginner bike.
Marami kang pagpipiliang gears.
Kapag paakyat, maaari mong gamitin ang maliit na chainring sa harap at malaking cog sa likod para gumaan ang padyak.
Kapag patag at gusto mong bumilis, maaari kang lumipat sa mas malaking chainring sa harap.
Para sa first-time rider, maganda rin itong paraan para maintindihan kung paano gumagana ang gearing ng bike.
Kailangan mo lang matutunang iwasan ang cross-chaining.
Huwag mong ipares ang pinakamalaking chainring sa harap sa pinakamalaking cog sa likod. Huwag din ang pinakamaliit sa harap at pinakamaliit sa likod.
Sobrang tabingi ng chain kapag ganun, kaya puwedeng maging maingay at mas mabilis ang wear ng drivetrain.
Ang shifters at derailleurs na makikita sa maraming Edge Quest units ay galing sa entry-level Shimano Tourney series.
Entry-level lang ito, kaya huwag asahang pareho ang shifting speed at smoothness nito sa Deore, SLX o XT.
Pero kapag tama ang pagkaka-assemble at maayos ang tono, ginagawa naman nito ang trabaho nito.
Dito rin importante kung saan kayo bibili.
Kahit branded ang derailleur, kung hindi maayos ang cable tension, tabingi ang hanger o mali ang limit-screw adjustment, pangit pa rin ang shifting.
May mga bagong bike na akala ng owner ay sira agad ang piyesa. Ang totoo, hindi lang na-fine-tune bago i-release.
Kaya sa SarapMagBike Shop, mahalaga sa amin na chine-check ang shifting, brakes, bolts at tire pressure bago iuwi ng customer ang bike.
Hydraulic disc brakes
Isa sa magandang feature na makikita sa maraming Edge Quest 29 units ay hydraulic disc brakes.
Kumpara sa basic mechanical disc brake, mas magaan karaniwang pigain ang hydraulic brake lever. Mas madali ring kontrolin kung gaano kalakas ang gusto mong braking force.
Helpful ito para sa beginners at bike-to-work riders dahil madalas ang hinto sa city riding.
May traffic lights, jeep, pedestrian, sasakyang biglang liliko at kung ano-ano pang kailangan mong bantayan sa kalsada.
Pero hindi porke hydraulic ang brake ay wala nang maintenance.
Kailangan pa ring tingnan ang brake pads, rotor alignment at lever feel. Kapag malambot ang lever o halos dumidikit na sa grip bago kumagat, ipa-check agad.
Iwasan ding malagyan ng chain oil o anumang lubricant ang brake rotor at pads. Kapag na-contaminate ang pads, hihina ang kapit at minsan sobrang ingay pa.
Ang brakes ay safety component. Hindi ito yung aantayin mong tuluyang masira bago ipaayos.
Maganda ba para sa beginners?
Para sa akin, oo, may sense ang Trinx Edge Quest 29 bilang first bike, basta tugma ito sa budget at intended use mo.
Ang pinakamalaking advantage ng budget bike ay nakakapagsimula ka agad nang hindi kailangang maglabas ng sobrang laking halaga.
Maraming tao ang interesado sa cycling pero hindi pa nila alam kung magiging regular rider ba talaga sila.
Baka sa umpisa gusto mo lang mag-exercise. Pagkatapos ng ilang buwan, baka ma-enjoy mo ang long rides. Baka naman matuklasan mong mas gusto mo ang trails, o baka bike-to-work lang talaga ang kailangan mo.
Hindi mo pa alam ang riding style mo hangga’t hindi ka nagsisimula.
Dito magandang magkaroon ng budget first bike.
Matututunan mo muna ang tamang paggamit ng gears, braking, basic maintenance, pag-aayos ng saddle height at pagpapalit ng interior kapag na-flat.
Malalaman mo rin kung ano ang hinahanap mo sa susunod na bike.
Gusto mo ba ng mas mabilis?
Mas magaan?
Mas relaxed ang position?
Mas malaki ang gears para sa ahon?
O baka mas kailangan mo lang pala ng rack at fenders para sa commute.
Hindi masamang magsimula sa budget bike. Maraming cyclist ang ganyan nagsimula.
Ang unang bike mo hindi kailangang maging forever bike. Ang trabaho nito ay dalhin ka sa simula.
Bakit okay ang budget bike bilang first bike?
Minsan mas nagagamit pa nang husto ang budget bike kaysa mamahaling bike.
May mga rider na bumili ng napakamahal na bike pero takot gamitin sa ulan, takot magasgasan at ayaw iparada kahit saglit.
Samantalang ang budget bike, ginagamit sa trabaho, sa palengke, sa exercise at sa weekend rides.
Siyempre kailangan pa ring alagaan. Hindi dahil mura ay puwede nang pabayaan.
Pero mas mababa ang pressure.
Kapag bago ka pa lang, normal lang na may mali sa shifting, maling gear ang mapili mo o matumba ang bike habang nakapark. Mas masakit sa loob kapag napakamahal agad ng unang bike mo.
Another benefit ay puwede kang mag-upgrade paunti-unti, pero hindi naman kailangang palitan agad lahat.
Ito ang madalas na pagkakamali ng beginners.
Kabibili pa lang ng bike, gusto agad palitan ang handlebar, stem, crank, fork, groupset, wheelset at kung ano-ano pa.
Gamitin mo muna.
Pagkatapos ng ilang buwan, doon mo malalaman kung ano talaga ang kailangang palitan.
Kung maayos naman ang shifting, huwag muna galawin. Kung okay ang brakes, gamitin muna. Unahin ang mga bagay na direktang makakatulong sa safety at comfort gaya ng helmet, lights, lock, spare tube at tamang saddle setup.
Mas maganda ang bike na ginagamit kaysa bike na puro upgrade pero hindi naman nailalabas.
Okay ba ang Trinx Edge Quest 29 para sa bike-to-work?
Para sa daily commute, marami itong practical na katangian.
Una, mas upright at relaxed ang riding position ng mountain bike kumpara sa aggressive road bike.
Mas madaling tumingin sa paligid at mag-observe ng traffic.
Pangalawa, mas malapad ang gulong kaya mas forgiving sa rough city roads.
Pangatlo, may sapat na gear range para sa flyovers, bridges at moderate na ahon.
Pang-apat, disc brakes ang gamit, na useful sa stop-and-go riding at pabago-bagong panahon.
At panglima, hindi ito sobrang specialized. Puwede mong gamitin sa trabaho ngayon, tapos gamitin sa recreational ride kapag weekend.
Pero kung gagamitin mo sa bike-to-work, huwag bike lang ang paglaanan ng budget.
Kailangan mo rin ng maayos na helmet, front at rear lights, reliable na lock, spare interior, tire levers at mini pump.
Maganda rin ang fenders lalo na kapag tag-ulan. Kapag may mounting points ang frame, puwede ring lagyan ng rear rack para hindi mo kailangang magdala ng mabigat na backpack araw-araw.
Sa commute, importante rin ang tamang tire pressure.
Huwag sobrang tigas dahil magiging matagtag. Huwag din sobrang lambot dahil mas mataas ang chance ng pinch flat at mabigat ipadyak.
I-adjust ang pressure base sa timbang ng rider, tire width at kondisyon ng kalsada.
Sino ang bagay gumamit ng Trinx Edge Quest 29?
Bagay ito sa first-time bike owner na gustong subukan ang cycling nang hindi agad bumibili ng mahal na setup.
Puwede rin ito sa students na gagamitin papuntang school, basta may ligtas na ruta at secure na parking.
Practical din ito para sa employees na gustong mag-bike-to-work, lalo na kung manageable ang distance at may lugar para magpalit o maglinis sa trabaho.
Puwede rin ito sa casual weekend riders na mahilig sa village rides, park loops, coffee rides at light long rides.
Magandang option din ito para sa mga matagal nang hindi nagba-bike at gustong bumalik pero ayaw muna mag-invest nang malaki.
Hindi ito para sa rider na ang main goal ay aggressive downhill, malalaking jumps o technical trail riding.
Minsan kasi hindi bike ang mahina. Mali lang ang bike na pinili para sa klase ng paggamit.
Sikat ba talaga ang Trinx?
Matagal nang kilala ang Trinx sa entry-level at mid-range bicycle market.
Ang kumpanyang nasa likod ng Trinx ay nagsimulang gumawa at mag-distribute ng bicycles at bicycle components noong 1990. May iba’t ibang product line sila, kabilang ang mountain bikes, road bikes, folding bikes at e-bikes.
May presence din ang Trinx sa iba’t ibang bansa at matagal na itong familiar na pangalan sa maraming Filipino cyclists.
Pumunta ka sa mga bike shop o sumali ka sa beginner group ride, malaki ang posibilidad na may makita kang naka-Trinx.
Ginagamit ito ng students, commuters, weekend riders at mga cyclist na naghahanap ng reasonably priced na branded bike.
Isa rin sa dahilan kung bakit popular ang Trinx ay madaling maintindihan ang position nito sa market.
Hindi ito no-name bike na walang malinaw na manufacturer, pero hindi rin ito kasing mahal ng premium international brands.
Maraming local mechanics ang pamilyar sa setup nito at karamihan sa piyesa ay gumagamit ng common bicycle standards, kaya hindi mahirap hanapan ng basic replacement parts.
Siyempre, hindi ibig sabihin na dahil kilala ang brand ay pare-parehong perfect ang lahat ng unit.
Malaking bagay pa rin ang tamang assembly, quality control ng shop at after-sales service.
Matibay ba ang Trinx Edge Quest 29?
Walang honest reviewer na makakapagsabi na hindi masisira ang isang bike.
Lahat ng bike nasisira kapag hindi inaalagaan o ginagamit lampas sa kanyang design.
Ang durability ng Trinx Edge Quest 29 ay nakadepende sa maraming bagay: bigat ng rider, klase ng kalsada, riding style, maintenance at kung maayos ba ang initial assembly.
Ang alloy frame nito ay generally suitable para sa normal commuting at recreational riding.
Pero ang kadalasang unang nangangailangan ng adjustment sa isang budget bike ay hindi naman ang frame. Mas madalas ay cables, bearings, brake alignment, spokes at drivetrain tuning.
Normal na kailangan ng follow-up tune-up ang bagong bike matapos ang unang mga ride.
Habang ginagamit kasi ang bike, puwedeng mag-settle ang cables at spokes. Posibleng kailangan lang higpitan o i-adjust ulit pagkatapos ng break-in period.
Para tumagal ang bike, huwag itong pabayaan na laging basa o maputik. Punasan pagkatapos gamitin sa ulan, linisin ang chain at gumamit ng tamang bicycle chain lubricant.
Huwag basta mag-spray ng oil sa buong drivetrain dahil baka mapunta sa brake rotor.
I-check din paminsan-minsan ang tire pressure at bolts. Kapag may narinig na kakaibang tunog, ipa-check agad bago lumala.
Ang pinakamurang maintenance ay yung ginawa bago pa naging malaking problema.
Mga puwedeng i-upgrade
Hindi kailangang i-upgrade agad ang Trinx Edge Quest 29.
Pero habang tumatagal at mas nakikilala mo ang riding needs mo, may ilang practical na puwedeng pag-isipan.
Una ay contact points.
Puwedeng palitan ang saddle kung hindi komportable, grips kung masakit sa kamay at pedals kung gusto mo ng mas magandang kapit.
Pangalawa ay tires.
Kung puro city riding at bike-to-work, puwedeng gumamit sa future ng mas fast-rolling tires para gumaan ang padyak sa pavement.
Kung light trail naman ang madalas mong puntahan, mas bagay ang tire na may mas agresibong tread.
Pangatlo ay drivetrain consumables tulad ng chain at cogs, pero palitan lamang kapag worn out na o may actual need.
Hindi practical na gumastos kaagad ng halos kapresyo ng bike para lang gawing ibang klase ang setup.
Kapag dumating sa point na gusto mo nang palitan halos lahat, baka mas sulit nang pag-ipunan ang next bike kaysa pilitin i-transform ang first bike mo.
Ano ang mga limitasyon nito?
Budget bike ito, kaya may compromises.
Mas mabigat ito kumpara sa mas mahal na alloy o carbon mountain bike.
Basic lang ang fork at drivetrain.
Maaaring hindi kasing bilis o kasing crisp ang shifting gaya ng higher-end groupset.
Hindi rin ito designed para sa competitive racing o aggressive trail use.
Pero hindi naman lahat ng rider nangangailangan ng race-level bike.
Kung ang goal mo ay mag-bike-to-work, mag-exercise, sumama sa beginner rides at magkaroon ng bike na magagamit nang hindi ubos ang savings mo, hindi malaking problema ang mga limitasyon na iyon.
Ang tanong lagi ay kung tugma ba ang bike sa kailangan mo.
Hindi kung ito ba ang pinakamagandang bike sa buong mundo.
Final verdict
Sulit ba ang Trinx Edge Quest 29?
Para sa beginner, commuter at casual rider na naghahanap ng branded budget mountain bike, puwede itong maging magandang starting point.
May alloy frame, 29-inch wheels, basic suspension, multiple gears at disc brakes. Ang exact components ay maaaring mag-iba depende sa batch, kaya mahalagang i-check ang actual unit bago bumili.
Hindi ito high-end at hindi rin ito para sa extreme trail riding.
Pero para sa daily use, exercise, weekend rides at bike-to-work, sapat ang features nito para makapagsimula ka.
Ang importante ay tama ang size, maayos ang assembly at ginagamit mo ang bike ayon sa purpose nito.
Huwag ma-pressure na bumili agad ng mahal.
Hindi presyo ng bike ang sukatan kung tunay kang cyclist.
Mas importante kung ginagamit mo ba, inaalagaan mo ba at nakakatulong ba ito sa araw-araw mong buhay.
Maraming magagandang cycling stories ang nagsimula sa simpleng budget bike.
Baka itong Trinx Edge Quest 29 na rin ang maging simula ng sa’yo.
Available ang Trinx Edge Quest 29 sa SarapMagBike Shop. Maaari kayong bumisita para makita ang actual unit, ma-check ang available sizes at malaman ang eksaktong specs ng kasalukuyang batch.
Mas okay pa rin na makita, mahawakan at masakyan ang bike bago mag-decide.
Ako si Ian How. Kita-kits sa susunod na bike check, at syempre, sarap mag-bike!